Rəhimli Tural Gəray oğlu 2001 ci il oktyabrın 27 də Abşeron rayonu Xırdalan şəhərində anadan olmuşdur.
Əslən Laçın rayonu Korcabulaq kəndindən olan Tural 2007 ci ilde Laçın rayonu 45 saylı tam orta məktəbə başlamış və həmin məktəbin məzunu olmuşdur. Məktəb vaxtı Vətənə bağlılığı Bayrağa sevgisi ilə hər kəsdən fərqlənən Tural Laçın həsrəti ilə yaşayırdı. Turalı tanıyan hər kəs onun bu sevgisini bilirdi.
2019 cu il oktyabrın 28 i hərbi xidmətə gülə gülə bayrağa bükülü vəziyyətdə yola düşən Tural elə ilk günlərdən könüllü şəkildə ön cəbhədə xidmət eləməyə başladı.
Azərbaycan Ordusunun əsgəri olan Tural Rəhimli 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Suqovuşanın azadlığı uğrunda gedən döyüşlərdə savaşıb. Tural Rəhimli sentyabrın 30-da Suqovuşan döyüşləri zamanı şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Tural Rəhimli ölümündən sonra “Vətən uğrunda” medalı ilə təltif edildi.
Azərbaycanın Suqovuşan qəsəbəsinin işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Tural Rəhimli ölümündən sonra “Suqovuşanın azad olunmasına görə” medalı ilə təltif edildi.