44 günlük Vətən Müharibəsi yüzlərlə qəhrəman oğullarımızı tanıtdı bizə. Belə igidlərdən biri də şəhid gizirimiz Azad Yolçuyevdir. O, Ağstafa rayonunun Kolayr kəndində anadan olub. Uşaqlıqdan idmana və hərbə böyük maraq göstərən qəhrəmanımız hərbi xidmətdən sonra təhsilini artırıb və gizir kimi xidmətini davam etdirib.
Vətən Müharibəsi başlayanda hamı kimi, o da döyüşlərə qatılıb. Kəşfiyyat bölüyündə xidmət aparıb. Şərəfli döyüş yolu Murov silsiləsindən başlayaraq Füzuli, Hadrut, Cəbrayıl, Kəlbəcərə kimi uzanıb. Sonuncu dəfə Şuşa döyüşlərinə gedərkən anası Ofelya xanıma Xarı bülbülün vətəninə getdiyini bildirib.
Azad Yolçuyev iyul döyüşlərində də iştirak edib. Müdafiə naziri Zakir Həsənov tərəfindən Silahlı Qüvvəllərin yaranmasının 100 illiyi münasibətilə xüsusi ordenlə teltif olunub. Əlavə olaraq 2013 və 2018-ci illərdə Silahlı Qüvvəllərin yubileyi münasibətilə medal ve fəxri fərmanlarla təltif olunub. Azad ailəli idi, 3 yaşında bir oğlu və 4 aylıq bir qızı yadigar qalıb. O, ölümündən sonra “Hərbi xidmətlərə görə” medalı ilə təltif olunub.