1973-1993
(Xırdalan qəsəbəsi)[b][/b]

Elşən Cəmil oqlu Qulamov 1973-cü ildə Abşeron rayonunun Xırdalan qəsəbəsində anadan olmuşdu. Ailədə dörd qardaş, bir bacı idilər. Elşən ailənin dördüncü övladı, qardaşların kiçiyi idi.

Natamam orta təhsilini əvvəl Xırdalan qəsəbəsindəki 2 saylı, sonra 3 saylı orta məktəblərdə başa vuran Elşən daha sonra Bakı şəhər 66 saylı Texniki peşə məktəbində təhsil almışdı.

O, həm də Xırdalan qəsəbə uşaq musiqi məktəbinin tar sinfində dördüncü sinfə qədər oxumuşdu. Lakin 1990-cı ilin qanlı 20 yanvar hadisələrindən sonra Elşən bir daha tarı əlinə götürmür.

1992-ci ilin may ayında hərbi xidmətə çağırılır. Bir müddət Qusar rayonundakı hərbi hissədə qulluq edir, sonra döyüş bölgəsinə göndərilir. Elşənin döyüş yolu Laçın rayonunun Səfiyan kəndindən başlayır. Ağır döyüşlərin birində yaralanmasına baxmayaraq, o, tərkibində döyüşdüyü hərbi hissəni bir gün də tərk etmir, həmişə qaynar nöqtələrdə ən çətin hərbi əməliyyatlarda iştirak edir. Muradxanlı, Şelli, Şahbulaq, Muğanlı, Qərvənd, Göytəpə, Mahrızlı kəndləri uğrunda qəhrəmanlıqla döyüşərrək şücaət göstərir. İgidliyi və qorxmazlığı nəticəsində dəfələrlə döyüş yoldaşlarını erməni quldurlarının mühasirəsindən çıxarır.

Amma amansız ölüm Vətən üçün həyatını əsirgəməyən bu qəhrəman oqulun da ömrünü yarımçıq qoyur. 1993-cü il oktyabrın 21-də Ağdam rayonunun Qaradağlı kəndi uğrunda döyüşlərdə qəhrəmancasına şəhid olur.

Subay idi. Bakıda Şəhidlər Xiyabanında dəfn edilmişdir.