1973-1992
(Xırdalan qəsəbəsi)

Rövşən Məcid oğlu Əliyev 1973-cu il mart ayının 20-də Abşeron rayonunun Xırdalan qəsəbəsində anadan olmuşdu. 1980-ci ildə qəsəbədəki 3 saylı orta məktəbin birinci sinfinə qəbul olunmuş, 1988-ci ildə həmin məktəbin səkkizinci sinfini bitirmişdir. Bundan sonra Rövşən təhsilini Bakı şəhərindəki 94 saylı Texniki peşə məktəbində davam etdirmiş və 1991-ci ildə oranı orta təhsil və bəzəkçi peşəsi ilə başa vurmuşdur.

1991-ci ildə ailə həyatı quran Rövşən tezliklə Sovet ordusu sıralarında hərbi xidmətə çağırılır və Qazan şəhərində qulluq etməyə başlayır. Lakin Azərbaycanın başı üstünü erməni təcavüzü aldığından Rövşən Sovet ordusunda qulluqdan imtina edərək doğma respublikamıza qayıdır. Elə həmin 1991-ci ildən etibarən “Ermənistan”la sərhəddə yerləşən Qazax bölgəsində Milli Ordu sıralarında qulluq etməyə başlayır. 1992-ci ildə Yevlax batalyonu tərkibində vuruşur.

Rövşən 1992-ci il dekabr ayının 10-da Laçın rayonu ərazisində erməni daşnaklarına qarşı aparılan hərbi əməliyyatlar zamanı itkin düşmüşdür.
Bu itkiyə dözə bilməyən atası Məcid kişi 1996-cı ildə vəfat etmişdir.

Rövşən üç bacının tək qardaşı idi.
Ondan yadigar Rəvşanə və Vüsalə adlı iki qız övladı qalmışdır.