1975-1994
(Ceyranbatan qəsəbəsi)

Hikmət Həsənağa oğlu Şirinov 1975-ci il aprel ayının 7-də Abşeron rayonunun Ceyranbatan qəsəbəsində anadan olmuşdu. 1982-ci ildə Ceyranbatan qəsəbə orta məktəbinə daxil olmuş, 1992-ci ildə həmin məktəbi bitirmişdi.

Atası Həsənağa Şirinovun dediklərindən: “Uşaqlığı gözlərimin önündədir. Sakit təbiətli, utancaq, təmizliyi sevən, çalışqan bir oğlan idi. Özünü yaşına görə aparmırdı, sanki qarşımda oturan böyük bir adam idi. Oğlumdan çox razı idim”.

1993-cü ildə hərbi xidmətə çağırılan Hikmət Cəlilabad rayonunun Prişib qəsəbəsindəki hərbi hissədə əsgəri qulluğa başlayır. Oradan könüllü olaraq Ağdam rayonunun Yusifcanlı kəndindəki döyüş bölgəsinə gedir, hərbi əməliyyatlarda iştirak edir.
1994-cü il mart ayının 1-də Ağdam cəbhəsində döyüş zamanı igidliklə şəhid olur.

Hikmət subay idi. Nazim adlı qardaşı, Sevinc və Sevil adlı bacıları var.
Ceyranbatan qəsəbə qəbiristanlığında dəfn edilmişdir.

Adı qəsəbə bağındakı xatirə kompleksində əbədiləşdirilmiş, adına qəsəbə bağında xatirə bulaq qoyulmuşdur.